مش عارف أنا ليه بأكتب الكلام ده... مع إنه غالبا مش حيقدم و لا يأخر... و مش حيوصل لناس كتير... بس أهه عالأقل أفرغ اللى فى نفسى بدل ما أطق و أتفرس
كلنا دايرين ليل نهار نشتم فى أم الحكومة و المسئولين... ربنا يجعل كلامنا خفيف عليهم... و على رأى من لا يؤخذ برأيه... اللى لا هو عادل و لا هو إمام... "إنما إحنا... إحنا .. إحنا ولاد كلب...إحنا بنضايق الزعماء وبنعكنن عليهم هما فاضينلنا الناس دى"ـ
يقول الله عز و جل
"إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ"
و رُوى أن سيدنا على بن أبى طالب - كرم الله وجهه - قال حين تولى خلافة المسلمين: "كنا نحن فكان فينا أبو بكر و عمر... و كنتم أنتم فكنت أنا فيكم"ـ
فعلى كده احنا نبوس إيدنا وش و ضهر... إن... بسم الله الرحمن الرحيم... بسم الله الرحمن الرحيم... فخامة الزعيم المبجل المفدى.. هو زعيمنا... احنا باللى بنعمله ما نستاهلش حتى ان احنا يكون لينا حكام زى دول... ده بس من رحمة ربنا و رأفته و عفوه إن الوضع كده مش أسوأ... مش قلتلكم ... احنا ولاد كلب... نستاهل ضرب البلغ
و أنا من موقعى هذا أشكر السادة المسئولين و أحييهم و أشكرهم إنهم بيعاملونا بما يملى عليهم ضميرهم مش بما نستحق ... لأن لو بما نستحق... كان مفروض نص الشعب يعدم فى ميدان عام رجما بالصرم
أنا فعلا بأتكلم جد ... و جد الجد كمان... المفروض إن احنا الأول نتغير عشان نستاهل يكون فينا ناس كويسة تحكمنا و ترتقى بينا... و أنا مش حأتكلم كلام كبير عن العمل و احترام الوقت و الالتزام و الأخلاق و المعاملات و احترام الآخر عشان أنا فقدت الأمل فى الحاجات دى.. عالأقل فى وقتنا الحاضر
أنا هنا حأتكلم عن مواقف بسيطة بأشوفها فى الشارع كل يوم... حاجات تافهة و صغيرة بس بتنرفزنى و بتطلع زرابينى... حاجات نقدر بكل سهولة نغيرها... و مش حأقول إن خلاص لو الحاجات دى اتغيرت الحياة حتبقى بمبى و المشاكل حتخلص و الشباب يلاقى شغل و يتجوز و المرتبات تعلى و الناس تبقى محترمة و المواصلات تفضى و الشوارع تنضف و كله يبقى فل الفل
لكن عالأقل أنا حأبقى مبسوط شوية ... و فى النهاية... ده البلوج بتاعى و أنا حر أكتب اللى أنا عايزه فيه... أمال أبعبر عن نفسى فييين؟؟؟
و مبدأيا ... أنا آسف على أى قباحة تصدر منى هنا... بس العالم دى طلعتنى عن شعورى
الحاجات دى ترتيبها لا يعنى أى شئ من حيث الأهمية أو الأولوية... ده بس حسب ما افتكرت أو قابلت فى الشوارع
ـ1ـ الأستاذ ـالمحترم ابن المحترم ـ اللى عربيته بتتخبط فى الشارع يقف زى ما ربنا شاء و الخبطة حصلت فى نص الشارع و ينزل يتناقش هو و المحترم التانى عشان يشوفوا مين ابن التيييييييييييت الغلطان فيهم... الدنيا ما وقفتش يابا عشان عربيتك اتخبطت و الناس التانية وراها مصالح و أشغال .. و فيه طلبة عندها امتحانات.. و ناس عيانة محتاجة توصل بسرعة للمستشفى.. وناس وراها سفر.. و بلاوى متلتلة... و مش حيحصل أى حاجة لو ركنتوا على جنب انتو الاتنين - و أى حد تانى عايز يتفرج أو يشعللها قبل ما يسلك - و طلعوا ..... .. بعض على راحتكم... الشارع مش شارع أبوك يا محترم انت و هو
ـ2ـ الأم الظريفة النضيفة اللى بتبقى مع ابنها فى الشارع أو العربية و الهوليجان الصغير بيشرب عصير و لا بيبربر فى منديل و عايز يرمى الزبالة... تقوم بكل جرأة و صفاقة و قلة حيا... تقوله افتح الشباك و ارميها... النظافة من الإيمان يا مدام... و مش حأقدر أقوللك اللى فى نفسى عشان بس بأخاف ربنا
ـ3ـ الراجل المحترم الكبارة اللى بيعدى هو و المدام عالكورنيش فوق النفق... و الله لولا إنى مش فاضى... و لولا خايف يجيلى مرض نفسى أو عقدة ذنب... كنت خبطك انت و هى و كل اللى معاك... و لو فلتت أو خبطك و ما متش ألفلك و أخبطك تانى.. ما النفق تحتك يا بنى آدم ... و حأمشيها بنى آدم.. و لا هو انتحار و السلام
ـ4ـ سواقين الميكروباصات و التاكسيات ـ أطال الله فى أعماركم ـ أرجوكم... معلش استحملوا الغلابة اللى زيى اللى ما لهمش فى السواقة و تعالوا على نفسكم و ما تحاولوش تسرعوا أما أدى إشارة إنى داخل يمين.. معلش ... أصلى حمار و ما ليش فيها... و ما بأعرفش أدخل الشارع اليمين من الحارة الرابعة فى نص الشارع زى المحترفين أمثالكم
ـ5ـ النقطة دى ما لهاش أى علاقة بالموضوع و مش حتحل أى مشاكل و لا حتخلى أى حاجة أحسن ... بس حتريحنى أنا والسلام
البنات المحترمات المبجلات .. و المرة دى فعلا مش تأريأة .. اللى كاتبين عالفيسبوك
Interested in women
أرجوكم ... بلدنا بتتفهم غلط... لو عملوا إحصائية حيفتكروا إن نص مصر و لا مؤاخذة
الحاجات كتير و لا تعد و لا تحصى ... و كل ما أفتكر أو أقابل تصرف جديد أو بنى آدم جديد من المحترمين اللى مش بيخلصوا دول حأقول... يمكن يتغير و لو تصرف واحد من التصرفات دى و أهه أبقى شفت حاجة حلوة قبل ما أموت
و ما زال للحديث بقية... ما دام فى العمر بقية... و فى الشعب ابن التيييييييييييييت ده بقية